Паян Чăваш наци телевиденийĕпе иртекен «Ир пулсан» кăларăмра ертсе пыракансем купăсçăсем çинчен калаçу ирттерчĕç. Çак кăларăмра хăнара Елчĕкри ачасен искусство шкулĕнче вĕренекен Роман Яковлев тата унăн ашшĕ пулчĕç. Рома купăс инструменчĕпе выляма вĕренме иккĕмĕш çул çÿрет, унăн преподавателĕ - Архипов Валерий Николаевич.
Кăларăма ертсе пыракансем Татьяна Матросова тата Иван Иванов çамрăк купăсçăна хаваспах кĕтсе илчĕç, интереслентерекен ыйтусем парса калаçрĕç. Рома ыйтусем çине тулли хуравсем пама тăрăшрĕ. Романа купăс инструменчĕ мĕн пĕчĕкренех илĕртнĕ иккен. Купăс патне туртăнни вĕренÿре палăрать унăн. Паян та хăйĕн купăсне тăсса илемлĕ кĕвĕсем янратрĕ тÿрĕ эфирта Роман.
Эпир хамăрăн вĕренекене сенкер экран çинче курма питĕ хавас!